AD ANDREAM PATRITIUM1

ODE VIII.2

 

Quae Siren3, adeo blanda, canorve ita

Dulcis, te Sophiae4, Patriti, in ardua

            Templa evadere aventem,

Diversam tulit in viam?

Tanti ne ulla fuit conditio, ut libris

Speusippi5 in latebras nobilis abditis

Facundoque Platone6

                        In pastum tineis dato,

Fortunae satius duxeris ad latus

Inter purpureos ire satellites7,

Aetatemque labores

Omnem insumere in aulicos;

Tum forsan veterem demum opibus Midam8

Aequaturus, ubi non fuerit tibi

Uno plus obolo9 usus,

Vecturae in pretium horridae.

Spes macras, moneo, desere, Patriti,

Pacatumque redi rursus ad otium,

Fortunatus abunde

                        Parto si valeas frui.

 

transkrypcja: Elwira Buszewicz