IN EQUUM

Ode XI1

 

Quadrupedum pudor et Seiani2 infausta caballi

Progenies, certissima pestis3.

Exitiumque altoris heri; quae premia tristis

Vecturae tibi nomine solvam?

Non tu ad Pisaeae4 natus certamina palmae,

Non circo5 sudare frequenti;

Non tu audire tubas, non obvius ire sagittis,

 Aut densas perrumpere turmas.

Magna loquor; neque tu visendis fidus amicis

Vector, inoffensumne patenti

Alternare pedem campo, dominumque paterna

Incolumem sub tecta referre.

Quam pene ad Stygias6 vexti me, perfide, valles;

Cocytum7, nautamque Charontem8,

Tergeminumque canem9, simulacraque10 luce carentum

Pallida Minoisque tribunal11

Visurum ante diem; teque audax Bellerophontes12,

Te, pavidis laniate quadrigis,

Hippolite13 infelix, Glaucumque14, rotisque paventem

Excussum patriis Phaetontem15.

Mille hominem casus circumstant, mille pericla,

Mille doli, totidem undique pestes16.

Omnibus inque locis passim natura dolosi

Insevit mala semina lethi.

Quae mortalis ubi pes institit, hostia saevo

Confestim nova sternitur Orco17.

O, quocunque mihi dicenda es nomine, rura

Pervolitans florentia, Nymphe18,

Quae fallacis equi prolapsum fraude tuis me

Alitis in rapidae obvia morem,

Excepisti ulnis clementibus; huc, age, faustum

Flecte vocata pedem, neque honores

Aspernare tuos; memores de cespite crudo

Dum meritae tibi ponimus aras,

Floresque omnigenos cumulamus, thusque Sabaeum19,

Non sine lacte, meroque bienni20.

Haec tibi ob acceptam libamus, diva, salutem,

Libaturi eadem omnibus annis

Munera, ubi radiante reciprocus axe revertens

Hanc lucem21 mihi reddiderit Sol.

At te22, pro faleris et sella, perfide, herili

Triste iugum, torquendaque montis

Machina caeca adstans supra ostia, difficilisque

Cum sale lucta manet lapidoso23.

 

transkrypcja: Elwira Buszewicz